【第57屆澳門格蘭披治大賽車】車女登場！昨日澳門上空萬里無雲，天氣晴朗，又是火辣的賽車女郎「騷哥利」大好時機，可惜她們像游擊隊一樣零星出現；其中一班賽車女郎的「領隊」透露，今年搵女難度較高，每人日薪2,000元以上，時薪近300元也未能打動小妮子化身車模。記者：鄧永賢、馬泉崇澳門直擊
猶記得去年的澳門大賽車撞正寒流襲擊，場內清晨氣溫僅攝氏10多度，但維修站內仍佈滿性感賽車女郎搔首弄姿，令場內熱力上升，氣氛熾熱。但昨日車女卻10隻手指數得晒，而且大部份「MadeinHongKong」，先莫說金髮美女，就連「Kawaii呢」（可愛）的日籍車模也未見影蹤。
Tubetop短裙媲美泳裝
說到最具睇頭的要數到身穿白色制服，一行4人來自香港的車模。她們雖然非「3點畢露」，但也接近中午方現身維修站，令一眾等待已久的龍友蜂擁而至拍照。身穿白色Tubetop短裙、年僅19歲的Jolin屬「處女登場」，她說︰「其實我都唔知點解會咁遲先出動，但我都覺得安排上有點混亂。」
帶領Jolin等4名車女的領隊透露，今年搵年輕貌美的車女難度頗高︰「因為Model在港有好多工作，我們揀女仔亦有要求，所以唔係咁易搵；但佢哋人工唔算太低，日薪2,000元以上，化裝及服裝則由贊助商提供。」
若以她們朝9晚4的工時計，時薪也有近300元，足足多過最低工資28元的10倍以上；但以要穿泳裝的模特兒標準來說，性感程度媲美泳裝女郎的車女，薪金則略為便宜。
狂轉「甫士」迎合龍友
不過，敬業樂業的車女也絕不欺場，鎂光燈下不停轉「甫士」任影，Jolin拍檔Kaki自認已為人妻，仍落力迎合記者及龍友；而身穿BraTop熱褲的格電車模JoJo及Ceres則表示會盡力做好自己，但她們第2次在澳門當車女，前者笑言仍被開車的引擎聲嚇到彈開。
今日賽事將進入白熱化階段，料有更多賽車女郎登場。
賽車女郎vs模特兒身價表
種類：賽車女郎
薪金：＊2,000元/7小時
時薪：約285元
種類：模特兒
薪金：#800元/4小時
時薪：#200元
註︰＊上班時間約為朝9晚4；#泳裝上陣的話，薪金雙計。
《花絮》
路車撞傷4人
噚日雖然未係正式比賽，但已經有好多意外，紅旗出完一次又一次，搞到F3同WTCC排位賽都要延至今日舉行。炒得最甘嘅，就係路車挑戰賽，中國嘅司徒建忠架GTR喺松山嶺南彎失控撞欄，零件飛到周圍都係，整傷咗場邊4個工作人員。「戰神」報銷（圖）事小，好彩就係冇人命傷亡，4個傷者已無事出院。
女車神撞甩泵把
巾幗不讓鬚眉，26歲嘅澳門女車手李靜雯（圖），今年揸法拉利爭澳門GT盃。呢位舊年喺康巴斯方程式贏過冠軍嘅女車神，噚日處女作就唔係好得，架過百萬嘅法拉利畀佢撞到連車尾泵把都甩埋，想喺東望洋賽道企凳仔，睇怕都要交多幾年學費。
龍友又影又拎
話就話噚日嘅車女一閃即逝，但只要一出現都定必引來成班龍友爭先影相，呢班龍友可謂有殺錯，冇放過；即使係呢位靚女派緊能量飲品（圖），班龍友一於少理，又影又拎。
