"辛達告魯斯勝乜乜球王"
好多頂級球會，家都鍾意踢4-3-3陣式，兩翼兼要插入中路射波。好少好似車仔咁，杜奧巴同安歷卡踢4-4-2咁出眾。打一個箭頭，唔少大牌自然要坐冷板，怨氣多屬人之常情，賓特拿鬧波士被貶到後備都冇份、艾迪巴約已經冇氣再嘈話離開曼城，索性玩放棄，你叫我補時出場，我就姿姿整整同你踢幾十秒；叻嗰啲，心態又有問題，朗尼及泰維斯，好似少女鍾意鬧情緒咁。機會唔係成日有，未到先好好裝備自己，見到辛達告魯斯喺曼城列第5前鋒，依然山長水遠帶隊嚟排名百幾位嘅香港盡數一場，個人又nice、靚仔又有球品，喺度祝佢明年1月有個新開始，29歲仔，咪喺度磨爛蓆嘞。
"預祝鯨魚今天封王"
講咗大半年、貼佢冠軍嘅鯨魚，今天終於有機會作客包尾嘅比馬，贏波提早4周封王；雖然澳洲中鋒約舒亞堅尼地可能倦勤，但班波大超，賠率乏味，直播博吓2:0，3:1波膽賀吓佢！
"無為而治？雲達華治講笑"
講開高佬中鋒，相信熱刺嘅高治同柏夫里約真高都算踢得愉快，球會戰事密，佢兩位喺4-3-3戰陣內多數輪流出，幫新丁老鼠仔雲達華治製造唔少入波機會，又有超級快翼加里夫巴利餵波，應該無詐型咯。哈利列納呢啲英國老江湖，面懵心精，係有啲辦法；敢用成億港元買個藥煲雲達華治返嚟，差唔多帶起成隊波嘅攻擊線，仲頂到家都未使長唞。雲達華治早幾日返荷蘭踢太公波時，接受訪問大爆老哈教波係任意發揮，連戰術板都唔用，球員一條心喺場上發揮自己水平就得。嘩！咁爽？就唔使摩連奴呢類大師啦。佢哋今日英超早場作客阿仙奴，冇戰術必被快過佢哋嘅阿奴扯散，熱刺有時問題就係中場組織唔夠緊密，不過馬會喺呢場北倫敦打吡開半/一盤，捧上盤太牌面，玩吓波膽算嘞，但約咗班好友廠迷一齊睇，過癮。
"皮利斯加盟 買維拉波衫"
喺沉悶嘅周中國際賽期間，最振奮當然係小弟近代頭號最尊崇嘅阿仙奴前猛將皮利斯，以剛踏入37歲之齡，落實自由身加盟傷兵滿營嘅維拉。這位被雲格都讚佢係當年世界最佳左中場球員嘅英格蘭球員先生得主，體力速度難復當年，但維拉家用好多後生仔兼雙箭頭傷晒，班波若有個世界級球員喺中場「」住，打反擊好有幫助，希望佢個膝頭哥捱得到半季，等我買件維拉波衫撐吓佢，周日早場佢哋作客唔叻嘅布力般，下盤冇走雞。
"以弱勝強 撐富咸破城"
禮拜三夜馬，喺電視機旁欣賞到替大摩馬房建功嘅華將賴仔喺谷草嘅威力，真係血脈沸騰，有時真係唔係外國月亮先夠圓，外國主帥操刀先夠鋒利。佢騎「海王子」用盡九牛二虎之力，博到個平頭冠軍，好身手！運動比賽，能以弱勝強，好爽o架，禮拜日馬戲碼強波弱；波想博冷，串埋曉士帶領嘅富咸冷W，招呼倒戈炒佢嘅曼城，以弱勝強，贏到乜仇都報晒！
文：蘋果波神
語錄：踢波唔係單靠一個人一種陣式，若對對賽球隊不熟悉，小心墮入軍情陷阱。