噚日下晝食完飯開工，好多人忽然感到震一震，飯氣攻心都即時清醒番，原來有地震。立法會係百年古蹟，冇避震功能，八方問過唔同黨派議員，多數都話感受唔到突如其來嘅震盪，可能議員都係久經風浪嘅人，對些少震盪冇feel。
惟獨自由黨主席劉健儀比較敏感，佢話開會期間的確感到震盪，仲覺得有一吓暈眩感覺，初時以為自己身體唔好，耳水不平衡或者血糖低，會後先知原來真係有地震。八方相信劉健儀真係覺得震到埋身，不過震央並非在后海灣，而是九龍灣，事關自由黨高層大地震，田二少北辰噚日下午終於正式宣佈退黨，喺九龍灣黨總部開記者會，呢次大地震醞釀多日，斷層牽連未來兩年選舉，餘震未了。