篤信風水嘅陳振聰近排頭頭碰着黑，冇理由唔搞啲嘢冲喜，八方收到風，佢細佬陳振鴻小登科，噚日喺港島香格里拉擺酒。
陳振聰身為阿哥，以主家身份到場，酒店方面不知幾大陣仗，5點半鐘未有賓客到，幾個職員已經喺宴會廳外把守，call埋保安，大約6點，陳振聰一家抵達酒店，快步走入宴會廳。近日甚為低調嘅陳振聰，見報時通常又瘦又憔悴，噚日養精蓄銳先至露面，八方見佢容光煥發，發福番少少，招牌哨牙重現！
兩兄弟關係密切
人逢喜事精神爽，不過陳振聰保安卻好火爆，幾個黑衣保安見到記者竟然批踭，酒店方面就「請」記者到酒店外面，飲就冇份，食西北風就有份。陳家有喜，幫陳振聰打官司嘅老外律師麥至理都去飲喜酒，律師黃國桐都有到，不過遲大到。
陳振聰同細佬振鴻關係密切，以振鴻名義開咗多間公司處理物業買賣同投資。陳振鴻又幫阿哥處理小甜甜畀嘅錢，過手款項以億元計，多年前陳振鴻買入麗港城打算結婚後自住，佢只有10幾萬元，首期都唔夠畀，要靠阿哥先買到樓。