早前有傳張繼聰（Louis）以千萬轉會費過檔金牌大風，榮升一哥，不過當事人澄清轉會是事實，千萬酬勞則是虛構。Louis更覺得哥前哥後三分險，自己未有資格，也不想做一哥，轉會後最希望是繼續做自己喜歡的音樂。
張繼聰已正式加盟金牌大風，日前他接受訪問，第一時間當然要問問他是否有千萬元過檔費，他說：「一千萬梗係冇啦，如果有人畀一千萬我都驚啦，一千萬要做幾多嘢先掂呀。做人最緊要知道自己個定位，有公司簽我已經好心足，可能以前習慣咗被人拒絕同等待，家有唱片公司簽自己真係好開心。」
「冇得罪任何人」
記者稱呼Louis做一哥時，他即耍手擰頭說：「唔好咁叫我呀，哥前哥後三分險，我呢啲小朋友嚟咋，係啲雜誌搵嘢寫吓啫。」他表示加盟新公司除了出碟外，下月3日會在九龍灣舉行「123音樂會」，當日同時間會推出新碟《456》，問他會否擔心人多手腳亂，意見比小公司多，自由度也相對減少？他說：「呢樣我又唔驚，因為之前同陳輝虹傾工作方向時，佢都畀好大自由度我。」
有指Louis因太太謝安琪的關係，令他與無綫的關係大不如前，問他會否希望新公司幫他與無綫修好關係？他說：「呢個係傳聞，我冇得罪任何人，我仲有得上《勁歌》，只係暫時冇司儀嘅工作啱我做。」
採訪：李珮洳 攝影：陳順禎
服裝提供：bauhaus
