經過金融海嘯、滙控（005）世紀供股一役，相信唔少散戶嘅股票常識都增長好多，起碼試過供股。不過，敏妮認識嘅散戶M，portfolio冇滙控，從未試過供股，佢最近卻要面對供股疑難。
話說當年中行（3988）上市，散戶M走去認購，結果抽到兩手，但嗰兩手股就急凍封塵揸到家陣，冇沽到亦冇增持。最近中行供股，佢收到經紀電話，問佢供唔供，於是求教敏妮。
先視乎前景 後考慮碎股
敏妮第一樣就問佢：「咁你睇好定睇淡隻股票吖？」由於散戶M完全唔知供股係乜嘢一回事，所以問，「睇好又點，睇淡又點？」前者當然係供股啦，後者咪賣咗個供股權囉！
由於今次中行供股比例係10供1，如果供股，散戶M得兩手貨，即係可以供200股，以每股供股價2.74元計，加埋手續費大概畀六百零蚊。除咗諗吓中行前景好唔好，佢仲要考慮一個問題，就係供股會出現碎股。不過對於散戶M嚟講，長揸收息，碎股問題唔大，但如果要買賣就唔抵，因為碎股賣價通常低過市價。
供股權可賣 唔理就嘥晒
至於唔供股，亦唔好當冇事發生，因為供股權本身都值錢，可以當股票咁喺市場沽出，唔理佢就嘥晒。
中行供股權上市編號係2946，噚日正式買賣。由於1股供股權加2.74蚊供股價，就可以換1股中行正股，換言之，將中行市價減去供股價就知供股權值幾多錢。噚日中行波幅介乎4.29至4.39元，扣咗2.74元，即係1.55至1.65元。所以噚日中行供股權全日波幅1.55至1.64元，200股供股權都值幾百蚊，扣埋手續費夠飲個Tea。
溫敏妮
http://wanmanli.com/blogs/