立法會噚日辯論全港市民如何參與共建西九文化區，動議內容望文生義，冇乜新意，議員講乜自不然都唔係新聞，可能因為咁，官員都懶懶閒冇心機應酬議員。應該出席會議聽議員噴口水嘅民政局德成局長，竟然遲遲未到，不過佢大佬，即係立法會主席曾鈺成卻視而不見，如常開會。
議員詹培忠睇唔過眼，質疑點解議員發言，竟然冇局長在場，曾鈺成不能護短，惟有宣佈休會，等德成局長到場。局長大人姍姍來遲，提出呢個動議辯論嘅鼠王芬氣上心頭，質疑德成局長唔尊重議員，否則唔應該遲到。噚日原來係鼠王芬生日，可是德成局長並無送禮，對議員提出多項建議，通通都唔接納，都算十分唔畀面，難怪鼠王芬咁㷫。