香港有兩個權力中心，一個在中環，另一個在西環，邊個較有「食」力，八方冇看法，但可以爆單料畀大家知。話說自由黨高層近日鬧分裂，田二少北辰要退黨，噚日下晝突然傳出消息，田二少會到西環交代事件，記者得悉後到中聯辦等候，傍晚5點半左右果然見到田二少蹤影。
噚日亦係港區人大舉行例會日子，不過要到晚上7點先至開會，田二少咁早到場，相信唔會係因為太得閒，搵幹部下午茶吹水啩，至於所為何事，佢自己心知肚明啦。記者等到晚黑8點幾鐘，先至接獲消息，原來中聯辦安排專車，靜雞雞送走咗田二少，免得佢被記者追訪。究竟田二少同「太上皇」彙報咗乜嘢事呢？謎團下回拆解。