老馬有火，絕對是好事。布斯韋利士飾演的法蘭，是前中央情報局幹探，已退休，食長糧。有天安坐家中，用電話去媾女，失驚無神被特種部隊狂攻，幾乎提早往陰間地府報到。看片頭字幕時，見到合演者還有尊馬高維治、摩根費曼、海倫美蘭、李察杜費斯，卡士勁則勁矣，好似全屬祖父級人馬。
最勁的還是看到演中情局檔案室看守主任的喧尼斯鮑寧，我心中嘀咕着，唔通我眼花？冇理由噃，佢仲未退休？真係老餅俱樂部？你話辛康納利夠唔夠老餅？前者一九五六年憑《君子好逑》榮膺奧斯卡影帝時，辛康納利尚未出道，佢六二年拍《碧血長天》仲只係演「衝呀」嘅大兵茄喱啡。結尾時我看工作人員字幕，果然是喧尼斯鮑寧！已然九十幾歲，勁呀！
之所以提出片中演員夠老餅的現象，是因編導玩的是老而彌堅、寶刀未老的概念，而尊老和敬老的誠懇態度，呼之欲出，甚至有意無意間指出，年輕的接班人根本未夠秤，難以擔當大任。原籍德國的導演只是四十出頭，如此敬老，值得表揚。
布斯韋利士稍為老餅，其他演員則更甚；雖然如此，影片卻出奇地好看，動作火爆刺激，但處處透着人情味和風趣幽默，而最重要的是言之有物。據說影片改編自漫畫，有此視野，非常難得。
撰文：黃國兆