華夏基金拍住花旗推勁貴基金！喺香港除非閣下係企業或者大富豪，否則好難買到華夏基金產品，而花旗見到散戶有需求，於是就走去搵華夏合作，推出一個主要投資A股相關產品（佔30%）及海外上市中國企業（佔70%）嘅中國精選基金，畀平民百姓有機會參與。
學對冲基金收表現費
呢隻芬由名牌基金管理，費用都係「名牌價」，首次認購費達5%、轉換費達2%、管理費每年1.8%，聽講本港基金嘅轉換費通常係1%、管理費1至1.5%。都唔止，隻芬仲效法對冲基金要收表現費，由於隻芬每日買賣，所以每日幫你計數，賺到就收10%，蝕咗唔計……照咁睇，呢隻芬至少要有幾十個巴仙回報率先夠吸引力囉！
雖則話貴，但花旗環球金融亞洲基金市務銷售董事鄧祖禹就唔係好擔心，佢話本港散戶嘅入場費只係1000元。俾1000蚊試下名牌，呢條隊至少由旺角排到落尖嘴喇！
李華華