港股近日飽受A股煎熬，尤其A股經常玩「午後凶鈴」，更嚇怕投資者，幸好昨日A股終於站得住腳，能夠升市收場，恒指期貨亦終止過去幾日跌勢，回升362點，暫時與昨日專欄「短期縱彈，調整未完」的上半部份脗合，至於會否進行下半部份，當然要看下回分解。
昨日中港股市能夠反彈，相信與國務院提出4招（確保供應、加強補貼、加強監管及嚴懲惡意炒作）穩定價格措施有關，可能有人奇怪這類措施明明顯示中央會出招調控，為何大市不跌反升？
其實投資者最驚就係蒙在鼓裏，唔知傳聞幾時會變真，既然中央願意露少少底牌畀你知，情緒自然好轉，所以反彈亦好平常。
好多朋友覺得昨日的反彈好大，尤其見不少焦點個股都有不俗升幅，但士佳認為大反彈起碼都要挾大成交上升3%，即約600多點，或者出現上升裂口後，大市能夠企在上面兩三天。
自己昨日趁反彈減持了小量個股，讀者或會奇怪既然筆者認為調整未完，為何不伺機大手減持？我只能答你，士佳唔一定啱，萬一錯了，同大戶做相反動作就弊傢伙，反正就算再跌落去，揸住股票都係捱吓價，又冇做槓桿，衰極有限。
吼逆市破頂股
現階段最重要是做好兩手準備，一方面準備若然睇錯，大市不再下跌轉而直升，就要決定幾時買貨，自己會等大市先升多幾日才買。
另一方面，萬一大市與筆者估計一致，真的再向下插，到時一定兵荒馬亂，大家買貨必須有充足的勇氣及信念，做好捱價的心理準備，如果十五十六，惟有打定算盤唔好買貨。
至於買貨對象，一是昨日所講早前還非常優秀、前景無限，早幾天突然下跌的大股；二是昨日已不理大市，急不及待破頂的個股。
張士佳
寶來證券（香港）董事 投資服務部
mailto:[email protected]