不如上廣州行吓咯！」呢兩年都聽大家有此提議。廣州能成為港人北上短線熱點之一，事必有因，相信是亞運熱的正面效果。不過又有幾多人熱愛運動呢，但趁熱鬧是人的常性，好！「上廣州食好嘢咯！」
記者︰占占美
攝影︰占占美、陳日月
Model︰Kayi、Allie@Starzpeople
嘩~！廁所都靚過人!
廣州能成為近期各界尋歡之士的新寵兒，亞運熱只是其中點綴，還要靠自身實力。你到CasaLouisa就會知實力究竟是甚麼一回事。來到三層高的紅磚屋面前，外面圍了高高的黑色雕花鐵欄，感覺像豪華大宅。坐升降機到二樓，侍應話：「樓下已被包場，所以請你到二樓的VIP專區用餐。」正！無端端升格做VIP！未進內先「嘩！」一聲，黑白主調陳設，牆身仿石膏雕花牆、水晶吊燈、古堡式長枱高背座椅，甚至入到廁所都靚過人!同Kayi對望，「呢度係歐洲唔係廣州喎！」心裏嘩聲四起後，見盡頭有樓梯通往天台，設露天座位，環視四周未有高樓大廈包圍，夜晚到此飲一杯，氣氛情懷肯定倍增。
好Feel！Wasabi焗青口
選擇午飯時間到此，因聽聞其行政午餐只需168人仔（約$196）！有齊前菜、湯、主菜、甜品，話晒這裏裝修都花了二千萬呀！畀百幾蚊在此嘆一餐，值囉！點菜後，有時間不妨請侍應帶你遊一圈餐廳，她們很樂意的，但想拍照就會「諸多阻撓」，這點大家要留意！不過我仍見不少食客趁侍應唔為意，快閃偷拍即時青春留倩影。
餐湯與頭盤都與南瓜有關，前者是南瓜忌廉湯，質地頗濃稠，有啖啖南瓜香，後者是南瓜茸焗田螺，香港鮮有以南瓜茸代替薯茸，食落更健康清淡。主菜我選了pizza，很失望地餅底不厚不薄，也不夠香脆，倒是散叫的菜式如焗青口青芥汁，青口鋪滿了勁熱芝士wasabi，青口鮮甜，食落口時又熱又攻鼻，個feel好正！香燒羊骨扒寶雲酥，即伴松露汁，肉的熟透度剛好，羶味不重。總體來說，CasaLouisa的西餐是有保證的。
a.CasaLouisa︰越秀區達道路保安前街3號
推介!台風荒島小店
這一帶屬廣州舊區，有點老街式格調，行逛總比上下九的過份繁華舒服得多！行了三分鐘，就見有台式風味的店舖「簡HAUS2.0」，靠玻璃窗看去，全店柔和平靜，木色地板書架配昏黃燈光，好配合飯後眠一眠這主題。店前掛有大幅水松板張貼藝術活動的告示，又有一本簿任人留言，Kayi未等及影相已坐定定揮筆狂書！隔籬一幅白牆開了個小洞口，可望見內裏闢了個露天迷你庭園，內有兩張木椅及盆栽，牆身畫了一尾魚，種種都令我未進門先興奮。
開業不到三個月，店主之一是《城市畫報》總編，以德文解作住房的HAUS命名，小店還有個別名叫「荒島圖書館」，用意是擺放店主們和身邊朋友不捨丟棄的書本，書架上就是逐漸收納進來的成果，書本們最後不用葬身堆填區，是惜書人最大的安慰。根據以上種種，這裏已成為我在廣州最喜愛小店之一，決心要振興其經濟以免三個月後回來時便閉店消失。內裏賣的都是有心思的設計，環保牙籤連安全套形牙籤筒、木製機械人雙面紙巾筒，最歡喜是扮即影即有的相卡系列，附帶的相角相袋亦是體現了「簡約設計」。這裏亦是廣州鮮有售賣公平貿易貨品的店舖。
b.簡HAUS2.0︰越秀區達道路保安前街20號
63層停機坪睇廣州全相
廣州已成重點城市，錢途潛力巨大，酒店們都紛紛進駐，廣州中心皇冠假日酒店亦將在此插旗。酒店其實是由俗稱「六十三層」的廣東國際大酒店翻新而成，暫定下月啟業，以國際品牌五星級酒店來說，暫時是廣州市內最高的酒店。根據過往經驗，舊房間面積偏小，所以，現時房間都會由過往的兩三間打通，62層將是總統套房，63層則是停機坪，客人可要求到此參觀，盡情飽覽廣州市中心的風景呢！
c.廣州中心皇冠假日酒店︰越秀區環市東路339號
房價︰高級房每晚約$805起
TravelMemo
持有效回鄉證或卡均可。中國旅行社：28533533
於紅磡火車站乘直通車到達廣州東站，車程約2小時，每位$190。查詢︰ http://www.it3.mtr.com.hk
1元人民幣約兌1.17港元（文中價錢已折算港元）
220V，兩扁腳插座
WEEKEND好旅程
廣州
明日天晴，14-26℃
