劉浩龍（師兄）贏得97年新秀冠軍後簽約華星，之後唱片公司執笠，為了生計轉行賣錶。13年後，他再度成為華星旗下歌手。雖然他曾想過放棄唱歌，但因不少人在微博留言叫他再出碟，令他重拾唱歌信心。感情方面，他自言是怕醜仔，有對象也不敢表白。
近年劉浩龍似乎專注拍戲，原來他已兩年沒有出碟，直至最近才有新歌《冇事，有心》。師兄解釋他不是不想出碟，只是近年未遇到好歌，他日前說：「我覺得質量好緊要，如果求求其其搵十隻歌返嚟出隻碟就冇意思啦，而且我一直以來都有唔少好歌，我唔想打爛自己個招牌，所以一路等一首好歌出現。」
「拍拖一定講」
記者發覺劉浩龍心境比以前放得開，也比以前開心，他解釋以前是害怕面對傳媒，現時他覺得nothingtolose，就連感情事他都看得開，他說：「我真係唔識講大話，第時拍拖我一定會講，當然要問埋對方想唔想公開啦。講真我有冇拍拖真係關你乜事呀，嗰啲所謂公眾知情權都癲嘅，但係我真係唔想再收收埋埋啦。不過我家真係冇對象，就算有，我都係怕醜仔一名，唔敢表白。」
原來師兄曾想過放棄唱歌，專注拍戲，他說：「我等咗咁耐都冇一首好歌，我心諗係咪之前嘅歌運走晒去電影嗰邊，反而拍戲遇到都係好角色，今次《李小龍》仲要做奸角，有好好嘅發揮。」
當師兄參演電影《為你鍾情》時，棄歌從影的念頭於他腦海閃過，他說：「我覺得拍戲得到嘅respect比起唱歌大好多，就算我兩邊都好努力去做，電影嘅迴響一定大過唱歌，嗰一刻我覺得係咪要停呢？直至我開咗微博，成日都人有問我幾時出番碟唱番歌，咁我知道我唔可以放棄。」
採訪：李珮洳 攝影：黃偉雄
服裝提供：agnesb.
場地提供：BACKSTAGE