今日是六叔邵逸夫103歲牛一，無綫全台小生花旦出擊舉行台慶，為六叔隆重慶生，總經理陳志雲也剛趕及復職，於今晚亮相台前。不過昨晚76歲的六嬸方逸華已率先為六叔賀壽，兩人到六叔至愛的尖沙嘴半島酒店撐枱腳，享受浪漫的燭光晚餐。
六叔邵逸夫與太太方逸華昨晚8時許前後腳現身尖沙嘴半島酒店，六嬸乘坐一輛日本車先到達，隨後六叔乘坐拉上窗簾的福祉車抵後門，並由已在場的保安護送到一樓宴會廳，現場隱約可見廳內放有蠟燭，窗邊有薄紗，還有一班攝製隊人員，似為六叔拍攝片段。
今日是六叔103歲生日，更是他相隔19年後、新舊曆生日重叠同一日，所以六嬸率先與丈夫嘆燭光晚餐慶生，今晚無綫更會晒冷舉行《萬千星輝賀台慶》，全台藝員例必戮力演出。
志雲趕及亮相
另一焦點則是於日前趕及復職的陳志雲，今晚他也會亮相台慶。昨日陳志雲續返電視城上班，笑容滿面的他被問到是否肩負傾掂四大唱片公司糾紛及炮製《生死之交》電視版兩大任務時，他只笑而不答。
昨傳志雲黨抬頭，王喜新劇《冏探查過界》將推出，張繼聰又可上《勁歌》，王喜以SMS回覆：「我沒有抬頭的需要，因為我都沒有低頭過。」外事部副總監曾醒明則回應：「所有四大嘅嘢係陳生工作範疇，藝員選角同工作由樂小姐（樂易玲）直接向方小姐（方逸華）滙報，至於《生死之交》，喺佢官司未完結前暫時唔會安排。」
碧兒唔認死撐
昨日曾志偉、汪明荃（阿姐）及陳芷菁等於電視城出席台慶拜神，志偉對於志雲回歸大表贊成，他說：「真係恭喜！TVB真係好需要佢，陳生返嚟令上下同事關係更好，佢係一個好明白製作同熱心節目嘅上司，佢會爭取好多嘢，令大家條路更清晰。」志偉又力撐崔建邦絕非叛徒：「佢一路都好支持陳生，關心一個人唔需要表面嘅，亦唔使日日陪住佢。」至於被指反志雲的廖碧兒則自稱無辜，但她說：「由3月到家，我係冇同陳生通過電話，但有SMS聯絡。」會否擔心被指忘恩負義？她說：「朋友冇呢種感覺，總之我冇死撐。」
採訪、攝影：馬建華、王崇穎