老爺車唔一定要貴先吸引，樣子可愛就足以引死人。講到福士，OrangeVan笨頭笨腦，無論經過多少年的時間洗禮，喺車迷心中的地位依然有增無減。試諗吓，喺街度望見呢款麪包Van，Cute到爆，連o靚模見到都變成餓狼咁想擒實佢，真係正宗的「餓o靚之Van」啦！
記者：趙慧敏
攝影：陳盛臣
Model：Rika、Laying@GMEModels
鳴謝：JPGMotor
1959年出產 年過半百
好多人對「餓o靚之Van」都有莫名好感，不過現時香港真正的餓o靚之Van只有約20架，可以見到呢架喺50年代出廠的真貨，Keep得好好，點會放過佢呢！
「餓o靚之Van」由1950年起生產，正式名稱叫VWType2。至於VWType1便是我們熟悉的Beetle（甲蟲）。眼前這部綠Van，生產年份是1959年，屬VWType2第一代產物，已過半百之年，難得仲可以Keep到個靚樣，當然係靠車主的悉心照顧啦！
車主Oscar本身經營汽車公司，兼營古董車搜尋服務，因利乘便，從世界各地搜羅心儀的「餓o靚之Van」，不過現時已經買少見少，要搵一輛優質的非常困難，經一段時間搜羅，才以二十多萬港元從英國購入這部車，「買返嚟嗰時當然無咁靚仔，差唔多只得車殼，所有設備都係我重新設計。」Oscar說花了十多萬港元為它大變身，全車內外都翻新過，車身重新噴油外，他更從英國購入不少配件更換，務求令它變成「鎮店之寶」。
音響電視雪櫃齊晒
我覺得眼前這輛綠Van除是一部車外，反而更像一個家，車櫳後排恍如一間小部屋，厚身格仔紋皮櫳充滿古典味！不過也有現代級的享受，全車換上先進音響組合，加上24吋電視，那些10吋8吋的電視機仔無得比。
既然稱得上是部屋，小量傢俬當然有，電視機櫃前裝有一個小型雜物架、櫃桶仔、小型雪櫃及紅酒架。想Sweet啲，車頂全部鋪上咕墊，還裝了小射燈，亮起時浪漫氣氛即時滿瀉。
至於性能就請多點包容，始終是老爺族，不能陪你飆車，沒有空調，不過行車時依然順暢。Oscar話：「VWType2屬機械設計，有適當保養及維修，絕對可伴你走漫漫長路的。」
