股神畢菲特可能創咗全世界最貴稿酬紀錄！話說前日（星期三），股神喺美國《紐約時報》撰文整咗封答謝信，公開多謝同讚揚花旗國政府，喺金融危機中盡其所能令金融市場穩定落嚟，而花旗總統奧巴馬唔知係唔係想多謝股神嘅支持，就喺噚日（星期四）公佈，要頒個「總統自由勳章」畀股神，咁兩單嘢係咪關連交易？點知呀！總之咪夾都冇咁啱囉！
寫信多謝打救高盛
之不過，如果真係關連交易，股神呢次收到嘅稿酬就真係無價喇！事關呢個荷蘭水蓋極之架勢堂，花旗國總統每年頒一次，用嚟表揚對美國或世界和平有傑出貢獻嘅人，個Level仲係睇齊國會金質獎章，被列為美國最高嘅平民榮譽，而得獎者就唔需要一定係阿美利堅公民。
有唔少經濟同企業界猛人都得過呢個榮耀o架！好似聯儲局前主席格林斯潘、被譽為現代管理學之父嘅PeterDrucker、化妝品牌創辦人EsteeLauder、福特汽車創辦人HenryFord，同埋迪士尼創辦人華特迪士尼等等。
咁點解股神要多謝美國政府呢？即係咁，股神喺金融海嘯之中搵唔少，呢幾年佢投資嘅股票或公司，有好多都係因為美國政府打救先可以安然無恙，當中包括高盛同富國銀行咁。如果華華係股神，豈只寫信答謝，直頭同奧巴馬結拜啦！
李華華
mailto:[email protected]