醫管局成立20周年，噚晚喺會展筵開150席，衣香鬢影、醫醫熠熠不在話下，感動位係五代同堂，醫管局歷任有五個主席鍾士元、吳光正、羅嘉瑞、梁智鴻同胡定旭，前任、現任行政總裁都有亮相，已退休嘅衞福高官黃錢其濂、楊永強亦有蒲頭。
公院醫生增至逾5000
沉寂多時嘅禽流感重現香港，噚日盛大場面醫生雲集，大家秉承世衞一姐陳馮富珍嘅意志，一於冇有怕如常食雞，菜單上嘅茶燻雞冇抽起。醫管局經費以百億元計，噚日到場主禮嘅曾蔭權為醫管局算賬，指醫管局成立後，香港人越來越健康，男性平均壽命為79.7年，世界排名第四；女性更長命，達85.9年，世界排名第二，僅次日本。
過去20年公營醫療系統日益龐大，新增加八間公立醫院，醫生數目由最初大約2,300人，增至現時逾5,000人，護士則在20年間增加四分一，達到目前20,000人。醫管局有今日，現任主席胡定旭話首任主席鍾士元（大Sir）功不可沒，形容佢係醫管局「親生爸爸」！
睇見呢個「親生仔」開枝散葉，年逾90歲嘅大Sir相信老懷安慰。胡定旭又話20年來歲月神偷都偷咗醫管局唔少嘢，所有人嘅青春固然一去不回，連廿幾年前公立醫院帆布床塞滿走廊嘅場面，都一筆勾銷不復見，呢啲嘢，真係偷咗都唔使「恨」攞番啦。
陳慧琳唱主題曲賀壽
為咗賀醫管局大壽，請咗女藝人陳慧琳做「愛心之星」，主唱名為《創造曙光》嘅主題曲，拍埋MV，好認真。陳慧琳在《無間道》入面做心理醫生，十分搶鏡，喺《創造曙光》MV內都係扮醫生，一樣似模似樣。
醫生、護士好多都多才多藝，廣華醫院一班醫護人員噚晚組成樂隊上台表演，全場拍爛手掌，而多個病童都有上台唱歌，好可愛。除咗慶祝晚宴，醫管局正舉行徵文比賽，呼籲喺1990年12月在公立醫院出世嘅市民參加，因為當年12月醫管局正式成立，參加者只要提交一篇不多於50字嘅作品講述對醫管局感受或期望就得。
mailto:[email protected]