西九文化區設計概念諮詢今個星期六結束，三大入選陣營盡最後努力，希望突圍而出做得成世紀大生意，煲呔曾蔭權走咗去睇三個入圍模型，聽建築師講解設計理念同特色。當年煲呔主理西九時，欽點要有個巨型天幕做地標，家陣冇咗天幕，煲呔好似睇極都唔係好滿意咁，全程面黑黑。
睇咗半粒鐘，煲呔鬆人，記者問佢覺得邊個模型最靚啱心水，佢冇講嘢，只係用隻手指擺喺個嘴度，即係封口咁嘅意思。以建築大師NormanFoster為首嘅團隊、本地兵團許李嚴建築師事務有限公司及北京央視新大樓建築師RemKoolhaas帶領嘅OMA各師各法，西九項目鹿死誰手未知，八方唔希望又推倒重來啦。