過江龍印尼財團DeMonsa終於輸咗！喺2007至08年大手掃入豪宅同商廈嘅DeMonsa，因為無完成交易連環撻定，俾賣方沒收定金之餘，仲狀告到高院追收差價，咁DeMonsa85歲嘅大股東劉常仁，就以07年4月曾喺屋企跌倒，之後患上腦退化症（即係老人癡呆症），喺精神唔健全嘅情況下俾地產代理游說先簽署買賣合約為理由上訴，仲提出交易無效並反索償。而高院噚日裁定，DeMonsa一方理據不足，須向賣方補番差價同支付地產代理佣金。
涉3宗物業買賣
金融海嘯之前，DeMonsa喺本港地產市場都算叱咤一時，買賣多項商廈物業獲利逾億，但係因為投資過度，引發銀行減少貸款，08年中就開始將部份物業急急脫手，個別仲要撻定。呢次訴訟涉及3宗交易，分別係07年10月以1.22億元摩入貝沙灣兩個單位連車位，12月以2.11億元購入中環荊威廣場4層寫字樓，同埋08年1月以3832.92萬元摩入金鐘力寶中心一個單位。
高院判詞引述專家醫學報告話，劉常仁喺簽署上述交易合約期間，精神狀況正常，反而DeMonsa總經理嘅供詞有啲矛盾並唔可靠，所以裁定DeMonsa一方須分別補回差價555.9萬、3434.5萬同426.7萬，仲要就貝沙灣交易俾番131.8萬佣金過美聯物業代理，埋單總共係4549萬！
咁若果劉老先生無撻定兼持貨至今，係咪有賺無蝕呢？地產界老友話，家嗰批中環金鐘商廈同貝沙灣呎價，同07年底08年初相若，最多都係高少少，所以撻定都唔算好傷囉！
李華華
mailto:[email protected]