三個轆綿羊　舞得穩

綿羊仔既方便又經濟，好多人都想出番架嚟代步，不過最近眾多綿羊仔意外失事的新聞又嚇怕好多人，尤其自問平衡力唔多好的人就更卻步。如果係咁，不如考慮吓PiaggioMP3300ie及GileraFuoco500i，呢兩款新推出的三輪綿羊仔，無論平衡性及安全性都比一般綿羊仔更好，連唔識騎單車的人都舞得掂呢！

文：周達之
攝影：譚盈傑
Model：Alia&Sam@Puremodels

停車不用腳掂地

隨住款式越出越多，雙前輪型嘅綿羊仔近年開始冒起，試過的人都大讚行車穩定，兩個前輪提供雙倍抓地力，遇上凹凸路面同高速公路，就更加感受到好穩陣。就算係停車時，只要手指一郁鎖上前輪，車身就唔會左右傾側，唔使好似普通綿羊仔咁要伸隻腳出去撐住車身，分分鐘俾側邊架車車爆腳趾公！而制動距離方面更比一般綿羊短約30%。論安全及舒適，三輪綿羊介乎兩個轆與四個轆之間，正正填補了這個市場空隙。

■兩個前輪可因應傾斜度而調校高低，片彎都無問題。

■三輪綿羊特有的前輪鎖，一按即固定。

■獨立懸掛，凹凸地面都一樣應付得到。

女士至愛PiaggioMP3300ie

雙前輪概念雖然唔係意大利Piaggio最先發明，但廠商憑雄厚實力將它正式帶入市場。PiaggioMP3300ie的外形夠Cute，每公升電油大約可行30公里，前輪避震行程會自動調校以應付高低速行車，車身亦經風速測試，確保行車穩定，女士駕駛亦無難度。

■前後兩個儲物格夠放兩個頭盔。

男士鍾情GileraFuoco500i

來自同一集團的還有Gilera車廠的Fuoco500i，馬力比300ie更大，有40hp，每公升油約行24公里，標榜跑爛地，造型亦較為粗獷，適合追求刺激的男士。頭燈有防撞柵、鋼管Bumper，擺明戰鬥格。車身較300ie闊，所以沙板亦相對地縮小，免得佔太多空間難泊車。

■儲物格只可放一個頭盔，想放多個就要掛在車外。

■500i背光錶板設計與300ie同出一轍，一目了然。

中外齊齊撐

三輪綿羊一直有班支持者，所以生產商唔會放過呢個市場。「星月」係香港人較熟悉的國產品牌，08年引入香港的XY150ZK.B樣子趣怪，150cc，售價約兩萬元，吸引不少女性用家。早前Peugeot在巴黎車展亦發表過一款HYmotion3Compressor概念車具125cc，兩個前輪用電；後輪用汽油驅動，兼且有車頂擋風遮雨。各國車廠都咁落本開發，證明三輪綿羊將成為主流之一，各位準車主有無興趣呢？