即拍即睇　彈射50"

家人人愛拍片！行街隨處見到男男女女揸部DC扮導演；但拍完嘅片想即刻睇番？咁就要屈就喺個幾吋芒仔上！最近愛上BenQ新返DVS11，靚拍高清，仲可以將畫面投射出50"，即影即睇！想知點玩？立即上網睇片，但拍到興奮之餘，小心你都會成為別人嘅主角喎。

記者：許福合
攝影：陳盛臣
Model：DadaLo、Dominic@GME

最大投射50"

趁友人神不知鬼不覺，拍攝一下對方表情小動作，感覺特別有趣味！這部S11機身既薄且輕巧，所以偷拍攝位特別靈活；除一般影相、攝錄功能，佢最好玩係「即拍即睇」，機身3.5"屏幕只係拍嘢時嘅Viewfinder，機側配置嘅LcoS投影機鏡頭，先係此機主菜！
論質素，S11嘅投射畫質只屬玩票性質，不過投射吋數可以由5"到50"，只要揀個較白淨嘅平面，就可以隨時開片，但要留意投射到40-50"時，畫面會較為鬆散。

■開啟投射功能，投射鏡片就會有燈光射出。

■「超標」激投過100"，雖然粗咗啲，但睇Dada個背影都知光度夠！

1080p拍片

其實拎住S11，會當佢係攝錄機多過係相機；感光元件起用500萬像素CMOS，只能插值上1,600萬像素，影相功能相當「有限公司」；不過拍片時，就靚玩FullHD1080p畫質，影片流暢度同色水，相當不俗；嫌內置投影功能未夠高清？機身另備HDMI輸出，駁上屋企套靚影音系統，即刻兩回事！
仲有一點要留意，S11操作之簡易，同類機中實在少見；使用Touch芒，簡化咗好多操作，上半個屏幕顯示拍攝畫面，下半就會用作操作鍵，按下圓盤嘅右掣，就係影相，而左掣就會開始錄影。而拍攝時更有10倍數碼變焦可使用，想影近啲都唔使走來走去喇！另外，內置嘅10種預設模式中，夜景、運動同風景都算實用，在不設手動模式下，都可自選合適嘅拍攝Mode。