【本報訊】沙田污水處理廠昨凌晨發生的奪命車禍，男司機駕駛私家車在大埔吐露港公路撞的士後，未有停車反加速逃走，飛馳逾一公里後，在彎位衝入因修路封閉之快線撞雪糕筒，一盞封路閃燈打爆擋風玻璃飛入車內，事主疑扭軚閃避再直衝100米外的慢線，狂撞街燈及防撞爛，司機頭爆不治。
將剖驗有否飲酒服藥
28歲姓蔡死者人稱「阿彬」，與家人同住粉嶺和泰街一單位，未婚，為區內一間地產公司的地產代理。昨凌晨零時許，蔡駕車沿大埔吐露港公路左二線往沙田，駛至中大夏鼎基運動場對開，突然撞向前面空載的士車尾。私家車事後加速轉往左三線逃走。
「我架的士俾私家車撞尾後，私家車冇停下，反而加油駛走。我立即跟住佢，希望見到車牌報警，但車尾泵把甩咗一半行得唔快；我追咗300幾米到澤祥街支路入口，就唔見咗架私家車啦！」被撞51歲姓董的士司機無恙，事後向警員講述經過。原來私家車繼續沿左三線高速逃走，至一公里外沙田污水處理廠對開右彎位，疑高速掟彎衝入因修路而封閉的快線，撞倒多個雪糕筒；一盞掛在雪糕筒頂警告閃燈，更彈起打爆擋風玻璃直飛入車內。
事主為閃避迎面飛來閃燈扭左軚，再衝越三條行車線直衝100米外的慢線，撞毀街燈及10米防撞欄始停下，車頭嚴重毀爛冒煙，更有防撞欄鐵支插入車廂，事主頭部重創送院不治。據悉私家車殘骸內未覺有酒氣，警方將剖屍了解死者有否飲酒或服藥及意外原因。