香港就成日有奀星、o靚模博露點想出位，點知堂堂世界盃冠軍西班牙，都要露點搞噱頭；原來佢哋正宣傳全新波衫，韋拿、沙比阿朗素及洛蘭迪3位國腳，仲喺廣告赤膊上陣，露足6點畀大家睇！
送舊迎新剝皮露新衫
大家唔好心邪住，呢個三間體育用品公司嘅廣告，概念其實大有來頭，叫做「ANewJersey,BornFromWithin」（全新球衣，生於內在）。廣告一開頭就係西班牙3大型男韋拿、沙比阿朗素同洛蘭迪，着住南非世界盃嗰件舊波衫出場，然後用西班牙文講句：「呢件衫已成歷史」，就一嘢扯爛晒3件衫，露出結實嘅肌肉；然後3子就回憶世界盃所發生嘅嘢，包括沙比阿朗素喺決賽，中咗荷蘭殺人王尼祖迪莊一記「倀雞腳」，有暗踩贊助荷蘭嘅敵對對手一剔牌之嫌。伴隨嘅對白就係：「任何事我們承受，任何事我們戰鬥，任何事我們夢想、感受及生存，任何事令我們團結都來自內在，內在深處。」最後就拉開自己嘅皮肉，露出全新嘅國家隊主場波衫。
我求大俠一直都有儲開波衫，講真個款式就同舊款分別唔大嘞，最大分別都係肩膊位同腋下，有兩條藍間；不過對西班牙死忠球迷嚟講，就認真有紀念價值，事關右邊隊章上就繡上1粒金星，代表1次世界盃冠軍，左邊就有代表應屆世界盃冠軍金章，西班牙可以掛足呢個金章4年，連荷蘭、巴西、阿根廷呢啲強國，恨都恨唔到，背部就繡上WorldChampions2010字樣。
平安夜有得賣
新波衫一出，出席發佈會嘅一眾國腳都好興奮，中場沙維就話：「我哋穿上呢件新波衫感到驕傲。」不過翼鋒辛迪卡索拉就講笑咁話：「件衫好似有啲窄，驚啲肥肉走出嚟。」嘩！你係職業足球員都咁講，肥仔咪唔使旨意着？新衫會喺12月24號香港全線三間專門店開售，售價479大元。