人行行長周小川強調要嚴管流動性，增強貨幣政策之有效性、靈活性及針對性，嚟緊肯定要加息。
一邊打熱錢一邊加息趕游資回流銀行，似乎已成迫不得已手段，最低限度，內地已啟動工資上升配合醫改政策落實，社保基金出入市永遠快人一步，國企IPO又話要上繳10%股份予社保，只要政策真正能到位，根本唔需要該擔心因加息影響內需消費意欲。既然長痛不如短痛，人行快快加息吧！
觀察近日股、滙、債、商品期貨翻天覆地，明顯係炒作中國加息收水預期，大戶錢搵錢呼風喚雨之際，地球上更多咗個有米大炒家。
根據日本財務省公佈的國際收支報告，中國自今年年初連續7個月累計增持日本國債達2.3萬億日圓後，在8月及9月內卻打反手，累計減持2.4萬億日圓，然而買得最多係5月，當日圓仍處93.80/99.79之時，縱要蝕息，淨賺滙水都賺到笑，賺幅隨時1成有多，食住日圓走勢定揸沽策略，搞到日本仔估估下以為中國有咩陰謀，原來只係搵着數賺快錢，今年以來更加係沽多過買。
炒滙水低回報都肯買
美國財政部剛公佈9月份世界各國及地區持有美國國債狀況報告，中國依然係美國嘅最大債主，持有美國國債總計8835億美元。中國近3個月來連環增持美債，再創今年4月以來新高。繼5月及6月減持後，7月及8月分別增持30億及217億美元；日本繼續係阿二，第3係英國，而石油輸出15國位居第4，揸住2305億美元。
我國減持美債之時，剛好就係美滙指數處於88.45今年最高位之時，近月5大債主增持動作，好明顯就係預示美元見底回升嘅實際行動。
投資講回報，阿爺挑通眼眉，咁低回報都肯買，如果唔係炒滙水，唔通係出於對美國嘅同情心咩！
胡孟青
作者為獨立股評人