會展噚日高朋滿座，舉辦咗一場「中國經濟發展方式的轉變機遇與挑戰」嘅高端經濟論壇，可謂高手雲集，包括國務院前副總理、國家超級智庫首腦「中國國際經濟交流中心」理事長曾培炎、甚少發表公開演說嘅政協副主席董建華，同埋發改委副主任徐憲平等。
大會安排咗一個互動環節畀台下觀眾向講者發問。其中一個受關注嘅講者係廣東省副省長劉昆（圖）。有商家問佢，點樣可以搞好廣東嘅空氣污染，香港唔使受「氣」，劉副省長當然話已經落力搞好環境問題，水污染同空氣污染都有顯著改善。佢仲不經意咁彈咗句：「香港汽車啲廢氣，都周不時飄到廣東啦！」
李華華