添馬艦新政府總部落成在望，目前位於中環嘅總部，當局表明會保留中座、東座同埋入面棵紫檀樹，西座則拆卸賣地改建商廈，民主黨許智峯噚日同黨友一齊喺中環派傳單，要求市民支持該黨保留整個「政府山」建築群建議，即係西座都唔好拆，甚至連現時包圍政府總部嘅黑色圍欄都要留低。
許智峯指呢道黑色鐵欄，都算係市民集體回憶，因為好多時遊行後都會在欄上綁上黃絲帶，最好唔好拆。唔知係八方記性好，抑或許智峯記性差，呢道黑色圍欄，殖民地年代不存在，係回歸後老董上場後加建，係港人治港嘅政府自絕於市民嘅象徵，當年引起好大爭議，點解要留低呢？得十幾年歷史嘅鐵欄，竟然都有集體回憶？許生係咪太濫情呢？