有孫萬事足，醫委會主席麥列菲菲教授話期待已久嘅第一個孫出世，想多啲時間抱孫同陪伴家人，噚日宣佈辭去英基學校協會管理局主席一職，明年3月生效，管理局已經成立遴選委員會物色新主席。
麥烈菲菲04年起做英基主席，當時英基被揭管理混亂好多問題，麥烈菲菲臨危受命入去搞改革，精簡英基管理架構，加入家長代表、獨立人士入去監察，並引入國際文憑試（IB）。麥烈菲菲指現時辭職係合適時間，因為管理局成員任期明年秋季屆滿，畀足夠時間現屆管理局物色新主席，對下屆管理局工作係最好安排。英基現時有21間學校，15,000個學生，新任主席冇番咁上下江湖地位，好難睇實咁龐大教育集團。