天林叔於1947年經叔父王鵬翼引薦投身影壇，執導作品多不勝數，無綫熱播中的劇集《巾幗梟雄之義海豪情》的監製李添勝昨日在電話訪問中說：「我同天林叔唔同時期，但我有向佢偷師，我有留意佢好多導演工作情況，好似處理鏡頭、打燈、導演演員拍戲等技巧，真係獲益良多。」
林嶺東憶上月飯敍
憑電影《龍虎風雲》成為第7屆香港電影金像獎最佳導演的林嶺東，執導技巧同樣受天林叔影響，他昨日在電話中說：「佢係我恩師，我哋通常一年見一、兩次面，佢走咗我感覺好唔舒服，又走咗一個。一個月前先同佢食飯，當時佢仲好開心、好食得、好壯健。」
林嶺東早於兩、三日前曾到醫院探訪，他說：「我當時同王晶講，最緊要天林叔去得安詳。天林叔咁叻，應該冇乜嘢心願未了，拍咗咁多部電影、電視劇，弟子又好，子女又對佢咁好，好食好住，無憂無慮，仲成日打麻雀，天林叔應該都去得好安樂。」
此外，無綫外事部副總監曾醒明表示翡翠台會於明日凌晨起，一連四晚播出天林叔的作品，順序為《千里送京娘》、《啼笑夫妻》、《黃飛鴻之鐵雞鬥蜈蚣》和《精裝追女仔》。
採訪：葉雪