澳門特首崔世安噚日出席立法會答問大會，多個議員食住溫總訪澳時嘅講話向佢施壓，要求崔世安大開水喉全力派錢，將庫房向民生傾斜，開倉派米更好。又問佢如何加快培養澳門年輕領導人才，有議員話家澳門80後年輕人，好多都唔關心社會，擔心日後再冇澳人治澳。
話命運都好重要
崔世安上任一年，咁快就要佢培養接班人，莫非擔心佢腳痛？崔世安回答提問時話，曾經同唔少學生哥對話，覺得今時今日嘅年輕人，唔似得佢以前咁要聽晒阿爺話，有好多自己嘅諗法。佢又寄語後生仔，要做政治人才，除要爭取多啲機會學習，最緊要係有好多人支持，又建議想上位嘅年輕人，最好要埋堆，多參加澳門大小社團活動（當然係正牌嗰種），發揮潛能，自然有人賞識。最後佢有感而發，話從政要上位，命運都好重要。言下之意，似乎係講條命生得正才是王道，即係好似佢咁，出身望族，到時到候就時來風送，其他嘢都係次要嘅啫。