應屆落選香港先生葉建希因為貌似孫耀威，所以俾人改咗個花名叫陽光老孫。參選期間，佢同今年獨攬四獎嘅港男冠軍翟威廉都被視為頂頭大熱，可惜最後佢都係輸咗。不過，最近有讀者報料仲提供埋相片，當中有張相見到陽光老孫攬住個男伴，個男伴仲錫陽光老孫塊面㖭。另外一張就係陽光老孫同兩名男性友人攬頭攬頸，令人懷疑佢嘅性取向。
準備闖娛樂圈
陽光老孫噚日接受電話訪問，強調自己唔係斷背一族，佢話：「我梗係鍾意女人啦，嗰位係我選香港先生之後，同佢做完訪問後識嘅，好多時大家出嚟活動都有見面，所以熟咗，識咗三個月左右。」佢又話同相入面嘅兩名男性只係好朋友，唔擔心俾人誤會，陽光老孫話：「我都唔知乜嘢人喺我Facebook度攞相，同埋已經唔止一間傳媒搵過我。」佢又話為免再有不必要誤會，會將比較親密嘅錫面相刪除。
問陽光老孫家有冇拍拖，佢就話冇，但閒時會客串做健身教練，目前佢搵緊經理人公司準備發展演藝事業，成數仲好高。講開陽光老孫嘅斷背疑雲，其實選港男期間佢嘅花邊新聞多籮籮，不過都係話佢女，同男性就係第一次。