一年一度「樂施毅行者」又嚟喇！樂施會噚日為呢個善舉搞記招同啟動儀式，大會搵埋樂施大使羅寶文、樂施毅行者王維基同大家分享行善心得！今年係第二年參賽嘅老王話，扶貧查實同毅行者一樣，路途係好遙遠，而扶貧唔係話畀啲錢就搞得掂，亦唔係一朝一夕可以做到。（華華十個同意！）
舊年半途俾人認出
佢4月嗰陣跟完樂施會去尼泊爾偏遠農村考察之後，仲有好深體會──就係窮人更加願意幫人，一條村裏面，每人每月出10個盧布，好似以前香港嗰啲標會咁，月尾邊個有用就拎去先。
講番今年目標，出錢又出力嘅老王話，預咗係辛苦，舊年直頭行到想死咁滯，好在行到一半，俾人認出兼仲叫佢行快啲，咁先支持到佢撐埋落去……而玩咗4屆嘅樂施毅行者籌委會主席陳智思就向老王教路，佢話自己頭兩屆衰咗，係因為想爬人哋頭，完全無諗過中途見到好精神嗰啲係半途插入嘅，所以老王應該慢慢嚟，行自己嘅路……
咁有意義華華一定要寫多兩句，毅行者呢個禮拜五至日舉行，今年有1150隊參賽（有300隊係企業組隊），係歷屆之冠，而籌款目標係2600萬港元，記得多多支持呀！
李華華