維園年宵乾貨檔位噚日公開競投，在維園年宵擺檔已成習慣嘅支聯會都有到場舉手，以往由主席華叔親自出馬，今年改由副主席李卓人做代表，阿人可能經驗少，競投價比去年貴1,700蚊，總共用41,900元投咗1號同2號孖位。
華叔正化療病情平穩
華叔今年初證實患癌，所以冇長時間在維園為市民寫揮春，至於出年會唔會重出江湖，阿人話要視乎華叔健康狀況。佢話維園人多，不利華叔休養，由於華叔寫揮春係支聯會主要籌款方式，為咗穩定收入，阿人透露支聯會正趕製其他「民運年貨」應市，其中一樣係印上劉曉波同劉霞肖像嘅杯，實用又有紀念價值，另外又整緊劉曉波襟章，希望盡快出街。
諾貝爾和平獎下月頒發，支聯會12月5日會遊行到中聯辦，想綁黃絲帶同掛起市民給劉曉波嘅明信片，仲會豎起一幅5呎闊、20呎高嘅劉曉波巨型畫像，為迎接正式頒發和平獎儀式揭開序幕。據講華叔正養精蓄銳，當日到場聲援。華叔現接受化療，病情平穩，癌指數時高時低，佢已經報名參選月底舉行嘅支聯會新一屆常委選舉，相信連任冇問題。
至於因五區公投同政改方案與華叔鬧翻嘅社民連陶君行、長毛，據稱無意參選連任常委，陶君行同八方講，日後會繼續參與支聯會活動，「今年唔參選，畀大家都冷靜吓」。另一常委鄭家富，據說退出民主黨後，亦向支聯會中人表示無意再做常委。
社民連檔位再接再厲
舊人唔選，有幾個新面孔上場，幾個支聯會長情義工據說有興趣做常委，其中一個係花名「長人輝」嘅劉榮輝；網台「青台」林子健亦想交表。
講開社民連，今年佢哋賣「禮義廉Tee」喺維園出晒位，明年再接再厲，噚日以44,200元投到檔位，八方同好多人一樣，希望再掃「禮義廉Tee」，而佢哋亦會推出新產品，小道消息話可能以社民連近日黨爭為題材，希望支持者繼續撐佢哋，心意之外，真金白銀亦十分重要。