廣州亞運開幕，香港足球隊因為贏咗烏茲別克、孟加拉，逼和阿聯酋，得小組第二名出線，十六強賽事會面對阿曼，於是有報紙歡呼香港足球站起來了。翻查歷史，原來上一次香港足球隊在亞運打入十六強，已經係一九五八年東京亞運之事，當年主力球員，憑記憶所及，有何祥友、高保強、劉志霖、林錦棠等人，其他球員名字忘記了，係班霸南華與巴士嘅主將，球星級人馬，而今日之亞運足球，各國頂多係讓國家B隊上陣，少見大牌球員，故此話香港足球隊贏波當然係好，但因此而話香港足球站起來了，未免誇張一啲。
左丁山好希望香港足球真的站起來，恢復一九五八年之輝煌歷史，假如香港隊能在亞洲盃攞到冠軍，那就是最值得香港足球界自豪之事。唔好以為係大想頭，小國丹麥嘅人口仲少過香港，都攞過一次歐洲國家盃冠軍（一九九二）啦。一九五八年之時，以南華球員姚卓然、莫振華、黃志強、劉儀為主力，所有球員都係香港人嘅中華民國隊就擊敗南韓攞走亞運金牌，所以左丁山唔係太大想頭o架。
今屆香港參加亞運，可以攞到幾多塊金牌，等專家去估計，自己唔識，不過可以肯定嘅係，亞運之後嘅殘亞運（傷殘人士亞運會）之中，香港幾乎肯定可以攞至少一塊金牌。啱啱結束嘅巴黎IWAS國際殘疾人輪椅劍擊世界錦標賽，香港女子代表余翠怡、陳蕊莊、范珮珊及吳舒婷於女子重劍團體賽奪得金牌，做咗世界冠軍，呢隊人到廣州參加亞運，亞洲有冇人夠佢地打呀？呢次世界錦標賽之中，香港得五金二銀四銅，相信到咗殘亞運，攞番同樣數目嘅輪椅劍擊獎項，唔算係奢望。
寫到呢度，社工C來電話：「蘋果單仁講大劉兒子入關愛基金有段古，究竟呢位富豪第二代有乜料？」有乜料，唔知噃，只知道呢位三十歲大劉公子讀書好掂好掂，倫大國王學院讀法律畢業，LSE法律碩士，跟住到紐約金融機構打工，順便考埋CFA（幾難考到o架），然後返國王學院讀埋法律博士（PhD），單講學歷，猛過晒其他富豪第二代、第三代。政府委任佢做關愛基金督導委員會委員，猜想只係起步而已，好可能有機會成為未來公職王，如果佢想做而且保持形象嘅話。