仲有個幾月就係聖誕節，每年呢個時候，各大商場都落足本搞宣傳，吸引市民影相兼「血拼」。好似九倉（004）旗下銅鑼灣時代廣場，今年就掟咗成千萬，比舊年多起碼10%，號稱係時代廣場有史以嚟最豪嘅聖誕！
時代廣場個靚女董事凌緣庭（圖）同華華講，今年就將街頭派當代藝術家MichaelLau（即係本地Figure王劉米高）嘅作品，放喺露天廣場同埋二樓大堂，希望帶動營業額升兩成，人流升10%至15%！
另新地（016）嘅上水廣場今年聖誕推廣費會按年加碼3成，用成320萬。新地代理租務部阿頭鍾秀蓮話，佢哋發現，自由行客舊時去商場掃珠寶首飾同電子產品，不過今年已經俾日用品同化妝品取代……係啦，仲順便掃貴埋啲商場租金囉！
李華華