警察捉超速駕駛嘅全新「隱形戰車」曝光！警隊年中決定買入13架寶馬535i旅行車做巡邏車，兩個交通部警員10月去德國寶馬車廠驗收新車，喺當地知名嘅無速度上限嘅autobahn輪流試駕，大讚新寶馬自動波箱操控得心應手，引擎十分寧靜。
試車警員大讚
香港寶馬網頁冇呢款旅行車價資料，估計連埋首次登記稅售價隨時要近百萬元一架，不過政府買車免稅，對於警隊咁大手筆，大家唔使十分肉赤。
最新一期《警聲》報道咗呢次試車之旅，兩名試車警員先後試揸新車，《警聲》冇披露兩人揸到幾快，只係話佢哋「從容不迫地發揮該車的性能」。而535i旅行車據講由0加速至100公里只需6.1秒。
警方冇講明呢13架新寶馬日後係咪用嚟做「隱形戰車」，但透露試車期間同時測試速度偵測器，總之各位日後見到5系旅行車要小心。警方幾年前已買咗幾架寶馬5系房車做「隱形戰車」，呢次買埋旅行車，警方似乎情有獨鍾寶馬。