仲有個幾月先至聖誕節，不過幾個高官提早收到禮物，政府噚日宣佈多名高官調動消息，勞工處處長謝凌潔貞12月13日會升任教育局常秘，教育局常秘黃鴻超則在12月23日調去公務員事務局。公務員事務局常秘黃灝玄過去商務及經濟發展局做常秘，因為原本做呢個位嘅蔡瑩璧夠鐘退休。謝凌潔貞做常秘後，勞工處處長由食環署前署長卓永興接任。
此外，民眾安全服務處參事林國華本月22日升職總參事，接替退休嘅廖志強。官場早前傳出政制及內地事務局常秘羅智光有機會調去公務員事務局，結果由黃鴻超跑出，據講因為黃鴻超在公務員圈子入面人緣好，做呢個吃力不討好嘅位，風險較低。