上海世博雖然曲終人散，不過冇去過嘅香港人仲有機會感受吓世博氣氛，除咗呢排hit爆嘅電子動態版《清明上河圖》，另一個世博官方活動「香港動漫嘉年華」亦都返咗嚟香港，噚日開始喺博覽館展出，免費入場，等千里迢迢走去赤鱲角嘅市民睇完上河圖之後，再同32個港漫icon例如麥兜、十三點同老夫子嘅造型塑像影吓相。
展品中最巨型嘅步驚雲同王小虎有成三米高，香港動漫畫聯會會長黃玉郎噚日同八方講，呢批塑像入過世博園區，亦曾經在廣州同東莞展出，今次趁上河圖個勢一齊展出，等市民多啲認識吓土炮漫畫，但話歡迎市民摸吓攬吓呢批塑像，唔好整爛就得。