隔牆有耳:鄉議局地王考慮出售 - 李八方

隔牆有耳:鄉議局地王考慮出售 - 李八方

九龍塘地皮有價,屢創天價地王,鄉議局位於金巴倫道會址,待明年沙田新大樓落成啟用後暫未有新用途,用嚟畀鄉紳聯誼打麻雀似乎有啲浪費,八方聽聞鄉議局噚日舉行每月例會,特別閉門討論是否善價而沽。
鄉議局塊地估值以億元計,因此認為趁市旺出貨者不少,但亦有唔少意見認為地皮係風水靚地,有保留價值,何況鄉議局又唔等錢使,做乜要變賣產業?由於意見不一,因此噚日未有結論,稍後會開大會再定奪。
沙田鄉議局新大樓接近尾聲,但由於有些少技術問題,要明年4月先可以收樓,即係可能要出年7至8月先入伙。唔少鄉議局中人認為呢個安排唔妥,要求全速趕工,務必在明年5月前落成啟用。何解鄉紳咁緊張?因為新大樓係現任鄉議會委員最大功績,而佢哋任期明年5月底屆滿,若然年中後才入伙,呢單代表作咪自動轉賬畀下屆委員?