當浸大E神大戰百果園DaDa，你會幫邊個？享齊人之福？邊個唔想吖！但喺最新《星塵傳說Online》，你只能於兩位代言人間選其一；今日見帝國女皇DaDa率先現身試玩，佢一時變純情女神，一時又變身做性感邪惡女皇，等你班友仔未打機先噴血！
記者：陳國輝
攝影：伍慶泉
死對頭「浸大E神」
人、魔、精靈以及矮人等種族橋段，再次成為遊戲故事嘅開端！浸大E神屬於聯邦一方，而DaDa則是敵對帝國陣營。玩家任務非常簡單，你只須要選擇做Carol又或者DaDa嘅護花使者。
22職業隨時轉工
為靚女戰鬥至死，應該係每位Game迷人生目標！但究竟你係一出場即死嘅二打六，抑或係女皇心目中嘅戰神？除咗講經驗值，不得不提係呢隻遊戲嘅職業模式。
玩開傳統OnlineRPG，通常有多達幾十種職業畀你揀，例如你當初選擇做弓箭手，雖然升級快、攻擊力加強，但任何時間你必須以遠程炮攻擊敵方，唔止欠缺彈性，玩得耐仲超悶，打死一世工就係你呢亭人！
《星塵傳說Online》特別加入「星盤職業系統」，大分為魔法、近攻和敏捷型，細分有術士、主教、戰士、暗騎士、行者及巡守等，總共22種。呢個系統最大好處係，當你揀選作為遠程攻擊手之後，如果玩到悶悶哋，可以隨時轉做近身戰鬥職業，最緊要唔使刻意重新修煉，就能換取同一等級，慳好多時間！
儲怪獸卡提升能力
怪獸卡亦係遊戲好重要一環！每完成一項任務，或擊敗敵人，就會得到一張怪獸卡，入面除咗顯示怪獸相關嘅描述及其能力值，如果想極速加強自己攻防力，你就必須好似集郵咁，儲齊唔同類卡片，例如「哈蒙卡」、「圖拉丁的石像卡」以及「幽暗拉卡沃星卡」等，裝備到自己身上，跟住物理攻擊以及各種魔法均獲得提升。
單人匹馬打到嘔
《星塵傳說Online》既然支援連線，當然要一班人玩先過癮！如遊戲開始無耐，你就會遇到一條巨龍，雖然佢攻擊力超弱，但血量厚到一百萬點！以每次攻擊扣一千計，究竟要打幾耐佢先肯死？講到底，若然Call齊十位八位戰友齊齊打龍，效果點都比單人匹馬來得有效率！
Profile
平台：PC
玩家：多人
類型：角色扮演
（即日起進行公測）
http://lu.gameone.com