唔通真係黑開有條路？美國《紐約郵報》報道，風水富豪陳振聰喺美國被人呃，話說佢前年7月坐私人飛機抵達新澤西州嘅機場，請咗間汽車服務公司嘅司機嚟接佢入城，呢一程雖然只有13英里，但結果居然花咗陳生80萬美金（約624萬港紙）。
被盜用信用卡
原來陳生畀錢時碌卡，個司機用張卡嘅冧巴喺跟住嗰幾個月偷偷地前後碌咗成幾十萬。嗰時爭產案仲未開審，陳生富貴逼人，連被人呃咗錢都冇為意，後來銀行保安專家生疑揭發，個司機今年1月先被拘控。
不過，當地嘅法律專家話，正被香港警方商罪科調查同被稅局追稅嘅陳振聰，可能因為佢喺香港嘅官非，影響呢單紐約騙案嘅審訊結果。啲專家話，陳生雖然係呢單騙案嘅受害人，但如果單案交由陪審員裁決，佢涉嫌偽造遺囑單嘢可能影響陪審員對其可信性嘅觀感；被控嘅司機又可能會聲稱係獲得陳振聰授權，碌咁多錢作為嗰幾個月一系列接送服務嘅收費，家因為陳生被追稅同被拘捕，先反咬話係被人呃錢。
所謂禍不單行，似乎真係應驗咗喺陳生身上。