阿爺調控樓市，調咗一年，樓價仲係喺高位企定定，咁到底阿爺幾時先落重藥呢？有「大口強」之稱嘅華遠集團總裁任志強，噚日就為個市把脈。
強哥話，北京嘅樓價就好似豬肉價咁，仲會有排升，因為豬肉價由03年嘅5蚊一斤，升到家嘅15蚊一斤，樓價自然都要相應升兩倍！另外，佢覺得供需矛盾仲未消失，好似個充滿晒氣未放嘅波，唔理你點樣㩒落水，一鬆開手，個波都會彈返上嚟。居民對樓嘅需求，就好似嗰股氣，要有咗樓，啖氣先會消……
至於被認定為重磅調控炸彈、傳得㷫烚烚嘅房產稅，佢話要17年後先至可以推！點解？事關家先得3萬幾個註冊評估師，但係個市場至少需要30萬個先夠滿足需求，再加埋房屋數量唔清唔楚，所以房產稅要由一個城市試點先，參考燃油稅嘅做法，大概17年後先推到全國……係咪好有見地呢？