榮獲中國影帝殊榮嘅溫總訪澳兩日，要成就一齣好戲，連啲茄喱啡都係千挑萬選，唔跟劇本嘅麻煩友自動「人間蒸發」。呢兩日，最少有三個發起示威嘅澳門居民被「招呼」，一落街就俾十幾個大漢押上車，手法學足大陸國安，其中「澳門長毛」利建潤，到噚晚仍然下落不明。
被大漢捉上車帶走
澳門工人民生力量聯合工會理事長李少坤同紮鐵工會負責人王偉民本周六都離奇失蹤。澳門工民力量副理事長馮昭榮同八方講，兩人本來發起喺溫總訪澳期間示威，要求政府打擊黑工同肅貪。參加示威工人上周六喺指定地點準備出發，等極佢哋兩個都唔見人，就知出事。
王、李二人本周日晚終於蒲頭。馮昭榮話，王偉民喺三角花園準備示威，如廁時突然有12個大漢圍住佢，押佢上車，直至前晚先放人。李少坤就憶述，本來朝早諗住飲完茶就返工會準備示威物品，點知一出門就俾班便衣大漢捉住，押上車去咗新口岸，被帶去空置住宅單位，「住」咗一日，夜晚再押佢返屋企，警告佢唔准踏出家門。李少坤冇嚇窒，仲話煙癮起一定要出街買煙，大漢警告：「你一落街，就有第二個部門拉你！」李喺屋企個窗望落去，發現有三部車牌0字頭嘅政府車停喺佢樓下唔走，十幾人喺車入面隨時候命，直至前晚先離開。
雖然班大漢全程冇透露身份，馮昭榮估係司法部居多，而且李少坤都唔係第一次被「綁架」，「澳門有幾大？得司法部、司警同政治部，通常司警唔理呢啲嘢，今次多數係司法部做嘢。李少坤都係想伸張正義，唔會驚」。
澳門長毛仍未蒲頭
雖然澳門司警對外聲稱放晒示威嘅人，但係澳門長毛利建潤失蹤後一直未蒲頭，電話長響冇人接。澳門民主派議員區錦新都搵緊佢，家嘗試向利建潤嘅朋友打探下落。
為咗場戲一氣呵成，澳門政府綁架示威者之餘，手信街都要封閉。溫總到訪鉅記，成條街要封一粒鐘，搞到啲舖頭大嘆蝕章。崔世安同王光亞做左右護法，不過唔知係咪崔世安太早起身，表情好呆滯，演出未算完美。
mailto:[email protected]