近200名菜園村居民同支持者日前喺中環瞓馬路，抗議當局迫令村民喺新村未建成之前就要走人。公民起動何秀蘭都加入聲援，佢唔係瞓街，而係喺噚日去信立法會主席曾鈺成，要求批准喺聽日大會上，提出關注菜園村同非原居民村搬遷重置政策嘅休會辯論。
何秀蘭同政府翻舊賬，話當局喺立法會年初通過高鐵撥款後，曾經向菜園村村民承諾協助復耕同興建新村基本設施；但喺新村未落成之前，政府又迫令村民喺18號全數遷出，質疑當局違反承諾。新界北區嘅發展涉及好多非原居民嘅安置，何秀蘭話當局點樣安置非原居民，對本港城市規劃同發展影響深遠，希望曾主席可以開綠燈。