歐豬五國債務危機再被炒作，港股噚日再跌195點，收24027，企20日線樓上，成交唔夠1000億元，氣氛雖然略淡，但係指數喺支持位嘅沽壓明顯縮小，而內地股市噚日亦反覆靠穩，恒指正伺機上試位處24435嘅10日線。
歐洲債務危機嘅炒作啱啱開始，唔會咁快完，早排各類資產嘅價格都大幅炒高，家借消息調整好正常，但係資金氾濫嘅情況不變，之後資產價格都係會攀升。
百麗C輪24712：百麗國際（1880）噚日收報15元，逆市攀升3.4%，成交仲顯著增加，睇走勢好快會上試10月高位16元。百麗股價在過去年半呈一浪高於一浪走勢，業務概念清晰又吸引，推向18元會係未來嘅發展，可以諗吓隻C輪24712。
隻輪現價23.30仙，2011年5月3日到期，行使價14.68元，溢價13.4%，引伸波幅53.47%，槓桿率6.44倍（有效3.85倍），正股升上18元，24712睇44仙，正股跌穿14.10元就沽咗隻輪。
俊樺