有說，人對味道的記憶，比起對事情的記憶強，即是一提起某樣食物，那種味覺自然地浮現在腦海。照這樣的話，每次回憶土耳其之旅，味道總是甜的……是非常甜！
記者：蕭漢祥
攝影：譚盈傑
鳴謝：土耳其航空、AnatolianBalloons、GRSCorporationLtd
甜味小城
打從伊斯坦堡舊市集的糖果，到這次卡帕多基亞（Cappadocia）的蛋糕和雪糕，記憶都是甜到漏、甜到令記憶都積聚脂肪。被稱為奇石林的卡帕多基亞，除了奇石，在市面見到的店舖，都是餐廳、雜貨以及紀念品店。難得當日晨早八點幾路過Urgup一條街，兩旁十多間店之中只得一間cafe開門，於是入內一看。
店內早已準備好大量的曲奇（唔係朱古力曲奇，就係朱古力做餡），還有弄得非常精緻Cappadociastyle的蛋糕仔，有蘋果、葡萄和士多啤梨等味道，不過cake身一一都淋滿了糖漿，上面再放多種生果，那種視覺上的甜味，令唔怕肥的我都有點猶豫。就在此時，戴住彩色頭巾的老闆娘出現，熱情地為小記推介幾款雪糕及雪葩，分別是芒果味、西柚、咖啡、西瓜以及朱古力味。雪糕正如我所料，無論甚麼味都較甜，貼切土耳其人的口味，反而雪葩帶點酸味，中和了甜味，幾好食！笑容滿面的老闆娘同樣非常sweet，全程又餵食雪糕又「瑤瑤式」抱抱，除了因為咁早就咁多客人，也因當地較少遇到亞洲人而特別熱情。好客老闆娘說，這家店是家族生意，她們最愛製作好味的蛋糕與別人分享，難怪由蛋糕到店員都sweet到爆。
SukurogullariPastanesi
地址：CumhuriyetMeydani18,Urgup
軟糖一刀片下來吃
卡帕多基亞雖非購物城市，但也有不少小禮物買，而且都算便宜，例如五六蚊就可買到10張有特色的明信片。當地人口少土地多，不少地方用來耕作，農產品豐盛，使這些店內店外，都會見到一籮一籮的果仁、合桃、開心果、花生等放出來擺賣，也當然利用這些果實做糖果。好似cafe隔兩個舖位的雜貨店，像土耳其版的「優之良品」，將當地特產一次過show晒出來，最特別是一棟一棟由果仁製作的糖果，圓筒形放在架上，客人購買的話就會好似食卡巴一樣，用刀一片一片切下來，口感像吃軟糖，內裏混有果仁、花生等。這裏還有地道的土耳其茶及香料賣。
封樽煲牛肉
講咗咁耐，一直都是食甜品，咁正餐呢？講真，之前對土耳其美食的認識，都只限卡巴而已。在卡城的土耳其文化博物館及餐館，我試了一道非常獨特的PotteryKebap。午餐頭盤是沙律、麪包和薯角，主菜就係PotteryKebap，顧名思義，是利用陶器烹調的一道菜。廚師先將牛肉、番茄和洋葱等放入一個陶樽內，然後封頂燒煮，熱力在密閉的空間將材料的鮮味，包括牛肉的肉汁逼出來，原理就好似用高壓煲煮食一樣。完成後，最有gimmick是利用斧頭劈開樽頂，由於整個陶樽都要密不透風，樽頂都封得非常堅硬，要劈六七下才能打開，即時香味四溢。不過有一點要提醒大家，這道菜烹調需時，往往都會等到肚餓，但記得唔好食咁快，皆因陶樽的顏色同牛肉粒非常相似，唔睇清楚隨時食中碎片，整親就唔好啦！
小山洞一窺土人文化
如果上文沒提到這是一間博物館，單看棟樓外貌大家都未必會估到。而且博物館入口也不在大街之上，我們飯後由二樓的通道，穿過一大班職員在洗菜的平台，直達文化博物館入口。館內共有八個小山洞，每個洞內的擺設和故事，都反映一個生活文化，例如結婚儀式，新郎會在親友的歌聲與鼓聲之下，下跪迎接新娘；而主婦在家中除了打理家務，還有編織大大張的地毯。在這裏走一圈，就會細味出土耳其人在多個範疇的生活文化。最佳參觀時間最好係日間，因為館內人像公仔的畫工都較奇特，若果在夜晚加上燈光效果，心血少啲都俾佢哋嚇親。
CultureMuseum&Restaurant
地址：CumhuriyetMeydani15,Ortahisar,Urgup,Nevsehir
網址： http://www.culturemuseum.com
TurkishSweetie
溫馨提示：卡帕多基亞物價比土耳其其他城市稍低，想買土耳其飾物或圖中這類奇石擺設，這裏$5.4任揀6件咁多，抵到爛！
TravelMemo
持特區護照免簽證，BNO須簽證。土耳其領事館：25721331
土耳其航空由香港往伊斯坦堡，轉飛Kayseri機場，來回機票$6,990起。土耳其航空： http://www.thy.com.hk
1土耳其新里拉兌5.4港元（文中價錢已折算港元）
240V，兩圓腳插座
土耳其
卡帕多基亞
下周多雲8-18℃
