詹瑞文近年主力培育兩位徒弟，自己減少舞台演出，不過最近佢獲邀出關去紅館開騷，今次係阿詹首次踏足紅館，喺下年1月21同22日舉行兩場棟篤笑騷《踢館》。
為咗配合主題，佢日前同工作人員到拳館練拳以及影海報，佢以一個王小虎look上陣，貼咗兩條粗眉，佢話：「講到明係去踢館，個樣梗係要凶神惡煞，我條眉加粗咗幾有殺氣。」
請教千嬅瘦身法
從未接觸過打拳嘅阿詹，拍攝時要起飛腳，經過半個鐘之後，阿詹忍唔住話：「我終於明白啲歌手喺紅館開騷有幾辛苦，個個都話要減肥，原來唔係開騷前減，係影海報時已經減緊。我見到鄭秀文次次開騷都咁弗，同埋之前楊千嬅都瘦咗咁多，我打算打畀佢哋，問佢哋拎個餐單先得。」
囑觀眾先練功夫
阿詹表示歡迎觀眾即時踢館，佢話：「如果大家到時鍾意嘅可以上台踩場，不過一定要練好啲功夫先。」阿詹又事先聲明今次演出會有齊各個演唱會嘅精粹，佢笑笑口話：「喺台上換衫呢啲基本嘢就唔少得，但係我估冇乜人想睇，T-back我就唔着，因為我未操到有郭富城咁弗，總之個騷嘅內容一定有最hit嘅話題，同埋考慮緊有紀念品賣，因為次次林海峰開騷都話最賺錢係紀念品。」
