各大媒體近日鋪天蓋地，洗腦式告知大家重大訊息，就係你手上持有嘅港幣購買力將會嚴重縮水，齋擺銀行有齊存款保障都會唔見一截。
事關假如日日有兩萬蚊人仔限額你都唔好好利用，純粹揸港幣存款，咁過去3年你肯定已經因人民幣升值而起碼唔見12%。
炒樓兵團有男有女
只要再考慮埋通脹因素，手持現金腳踏實地存款入銀行原來有如「存款徵稅」，正正經經拒絕炒炒賣賣卻遭市場懲罰。在貶值與通脹雙重夾擊下，形同「雙鬼拍門」，可以預期今日揸得好實嘅一張紅底，兩、三年後就會得番唔夠80蚊購買力。好多師奶仔有見及此，紛紛為私己謀出路，對冲雙鬼殺傷力。大有大玩細有細炒，所以不時聽到有師奶炒樓兵團出沒，甚至係全男班。
游資充裕、銀行息低，存款擺明無出息，ELN及阿Q（Accumulator）呢類衍生投資產品又頓成市場寵兒。金融海嘯後，私人銀行銷售人員怕客戶再輸打贏要，打死都唔敢主動推銷。ELN普通按25%折讓價接貨嘅股票，又絕大多數係大藍籌如滙豐控股（005）及香港交易所（388），以一年到期ELN計，更可以達到19%年利率回報，單純與存款息率對比，個客會揀邊樣就真係唔使多講。
最大風險當然係未來1年之內隻股跌足25%至接貨位，而接貨後個市轉勢，揸隻正股又要望鄉。
至於阿Q，今時今日做得嘅通通都肯定係個客做主動，而且都唔會再做4倍咁多，頂晒籠都係做兩倍；風險當然又係來自要接貨加埋接完貨股價再跌。
然而好多有實力坐貨嘅阿Q，兩年幾三年前介乎180至200蚊接晒港交所後，都紛紛叫做見得番家鄉，所以呢排隻股上到呢個阿Q重災區好明顯暫難突圍，起碼要完成消化期才有望更上層樓。
胡孟青
獨立股評人