香港有個政黨外號「禮義廉」（無恥），我求大俠就估曼城好快就成為「英超禮義廉」。上周六佢哋喺主場竟然畀排名尾3嘅伯明翰悶和0:0，近5場聯賽只贏1場咁大把，但呢支億萬大軍不但冇知恥近乎勇，韋拉、尼祖迪莊、高柏尼同巴洛迪利呢4位衰仔仲各自各精采，齊齊搵好節目歡度禮拜日。
巴洛迪利唱好伊巴
對伯明翰時因為停賽冇份踢嘅前鋒巴洛迪利，就飛返米蘭睇米蘭市打吡戰；雖然呢位臭馬出身國際米蘭青年軍，但對母會一啲感情都冇，之前已經爆過喺國米更衣室高唱AC米蘭會歌，又着AC波衫，家轉埋會去曼城，仲唔打正旗號「反國米」。
打吡戰踢完後，巴洛迪利專登走去當地電視台鏡頭面前，口中不斷唱：「伊巴、伊巴、伊巴。」咁啱AC就係靠叛將伊巴謙莫域一箭定江山，以1:0擊敗國米，巴洛迪利咁高調唱好AC叛將，國米球迷唔憎多佢幾錢重就假。
3兄弟睇F1兼篤背脊？
巴洛迪利都叫做去睇波，同本身職業都有關；不過韋拉、尼祖迪莊同高柏尼，就接受贊助商邀請，專登坐7個鐘頭飛機，由曼徹斯特市飛到阿布扎比，睇F1賽車最後一站。仲得到贊助商安排，唔單止有VIP位坐，更加可以近距離接觸戰車同車手㖭！
曼城呢排沉成咁，韋拉、尼祖迪莊同高柏尼呢3位仁兄，就算唔自動請纓加操，都應該好好休息，準備下一輪聯賽；家飛嚟飛去睇賽車，擺明唔志在份工啦！不過，我求大俠就好奇怪，34歲嘅韋拉，一向出名鬥志好，落場踢波畀足120分精神，今次飛去阿布扎比，表面可能真係睇賽車，實際「上訪」富豪班主蒙蘇都唔奇。事關曼城領隊文仙尼呢期排陣、用人都亂咁嚟，好似想博炒咁，如果再畀呢3位球員篤背脊，睇怕份工都捱唔過聖誕節。