出外試車，唔係下下都要大cc加Turbo爆住去，今次一改口味，換上Subaru經典細車R2，喺新加坡橫街窄巷自由穿梭，靈活瀟灑之餘，六百幾cc又勁慳油，停親燈位又大把人望。夠靈活、有收視、裝到嘢、慳油錢，呢個矮仔確係幾有計。
記者、攝影：徐影龍
鳴謝：MotorImage
起圍夠快更實用
《星戰》迷咪誤會，SubaruR2跟矮仔機械人R2D2並無親屬關係，不過同樣四肢俱短、用途多多，適當時候梗幫到主人一把。繼Forester後，MotorImage再安排R2讓我實戰新加坡街道。說是實戰又太凝重，R2配備658cc引擎，毋須大油狠試，全程輕輕鬆鬆周圍逛，反倒感受着少有嘅悠閒駕駛樂趣。
R2身材短小，穿梭密集市區發揮到的骰靈活優點。興之所至，想到Kovan嘆吓地道「CoffeeO」黑咖啡，繁忙道路兩旁只要有小小位，已足夠我泊車嘆咖啡，呢點相信大把女仔會認定係揀車條件之一。跟住到訪聖淘沙環球影城，入島必經嘅HarbourFront，基本上同尖沙嘴一樣，人車爭路無日無之，R2車身夠輕緣故，起圍特別爽快，攝位、Cut線時零舍得心應手，且每當慢車或停燈位時，總會有途人眼望望，見到我呢個鬍鬚司機後，又再專心打量車身其他部位，收視率頗高。
車價抵玩 驚喜油耗
玩咗大半日，夠鐘準備會合一位新加坡朋友，去到目的地先知擺烏龍、Set錯GPS！兩地相差成13公里，情急下油門自然加重力度，R2又畀到我應有嘅反應，尤其新加坡極普遍嘅燈位掉頭、右轉等，好多時有其他方向車輛切入，R2就係憑住輕身起圍快，兼且迴旋半徑極細，毋須等迎面而嚟嘅車走晒，已可踩油揚長而去。上橋、走快線，連甚麼拖低L波、閂冷氣等竅門統統都無用之地，R2一樣爽快。
最實際係夠慳家，全日行咗差不多60公里，計番耗油只約21km/L，以香港油價計即係約$0.65/L，拍住Hybrid車嘅表現，最正係新車價只係10萬多少少，對預算有限又想買架實用代步車嘅人，的確幾啱數。
引擎：658c.c.直四DOHC
馬力：54ps/6,400rpm
扭力：6.4kg-m/4,400rpm
傳動：智能無段波箱前驅
售價：$103,335
查詢：25112727（Subaru陳列室）