我哋祖國乜都貴，但地球另一邊就好似有啲唔同！花旗國下個禮拜就係感恩節，根據當地傳統，每家每戶例牌都整番隻火雞應吓節，咁啱美國農業部估計火雞今年嘅產量會少過上年，照道理，火雞價錢應該係爆升，點知……
根據美國農業局聯會（AFBF）嘅資料顯示，一隻16磅嘅火雞盛惠17.66美金，約138蚊港紙，比舊年足足平咗成5%！點解會咁？全球最大連鎖零售商沃爾瑪近排亦做咗個調查，發現係經濟唔多掂嘅情況下，好多美國人都要勒緊褲頭過日子，家有6成美國家庭嘅感恩節預算開支同上年一樣。所以啲舖頭為咗吸引多啲顧客，咪將啲火雞割價出售囉！所以話，火雞大平賣反而唔係一件好事嚟o架！